|
وصف المعاناة
شعر عبدالرحمن
عبدالله المحمدي |
|
لو جيت أوصف للمعانـاة توصيـف
فاقت وزادت كـل وصـف ومعانـي
|
|
وابغي اختصرها مثل ما قيل تخفيـف
عمـا يعانـي قلبـي اللـي ابتلانـي
|
|
رحت الطبيب ولا عرف علتي كيـف
ما يدري إن إخلاصي اللـي رمانـي
|
|
أخلصت في حبي ومعطي الهم تسويف
اثر اللي شريته باعني مـا شرانـي
|
|
وضيعت وقتـي ورى حـب تزييـف
وملزوم أجرع كأسـه اللـي سقانـي
|
|
فيني الم من عدت أعوام مـا شيـف
وهلحين شافـه كـل منهـو رأنـي
|
|
ما عـاد ينعالـج بكثـر التحاسيـف
يالله تفـرج كربتـي فـي زمـانـي
|
|
يالله ياللي تصرف الكـون تصريـف
ياعلم(ن) في سـري اللـي أعانـي
|
|
أنت اللي قادر توقف النزف توقيـف
وتبـدل الآهـات شـوق وحنـانـي
|
|
تبدل حياة الحـزن للـي بغطاريـف
وتملـي حياتـي بالأمـل والأمانـي
|
|
على رجاك مغلـف الصبـر تغليـف
وما يخيب منهو لاذ بـك واستعانـي
|
|
وأنا انتظر سفينة نجاتك على السيف
على الأمل عايـش واعـد الثوانـي
|
|
ولا بـه حسافـه ولا مـن تكاليـف
دام الأمـل موجـود والعمـر فانـي
|
|
ولا العارف يعرف ولا يريد تعريـف
واللي كتب لك مـا يتعـدى للثانـي
|
|
واللي ما هو لك ولو تعلا المشاريـف
ما تنـول منـه إلا العنـا والتفانـي
|
|
عش واقعك يا قلب خـل التخاريـف
واللي جرى لك ما هـو إلا امتحانـي
|
|
وان ردت تنجح لطف الجو تلطيـف
وانظـر أمامـك ولا تـدور بمكانـي
|
|
يحماك ربي من شـرور العواصيـف
ولا بد ياقلبـي مـا يحيـن الأوانـي
|
| |